خماسة
بيني و بين حبي انا و حبي و غير حبي و الزايد لالا
حاجة مخبية مانبغيش تبان
جمرة كوات قلبي من عند ربي و بان غلبي و قوات الحالة
و لي بغى يقيس يجرب المحان
حاجة مخبية في خزاين المولى
لي نهداتلو تسعدلو الايام
ماهي واعرة ما تتعطى بسهولة
الا لي قدا و فارس في الكلام
يفهم المعاني و رموز الفالة
يقوم على الفجر و يبيت سهران
يستلذ المرورة يسقى بالدالة
يفوت على العريش يولي نشوان
خماسة
هذا بحر غامق من تحت مواجو
سالو عليه ناسو هوما الرياس
ولا عمود راشي منهو يحتاجو
النار تاكلو ما يفطنش خلاص
مولاه ياوخيي فايت الجوالا
متلف الطريق ما جبروه للان
مشى وراح سافر عدى ما ولى
دا معاه كلمة حب الفتان
خماسة
دا معاه صورة تحرق في قلبو
ما هي مكونة الا في الخيال
دا معاه كلمة نبغيه نحبو
سمعها مقالتو و ملات البال
ملات بال عاشق مخصوص سقالا
يفيق من المنام و الحلم العيان
هذا الغرام خالي و ناسو رحالا
غدوة خلاص ما توجدهم في مكان
إرسال تعليق