حكاية #ستوت_أم_لبهوت
حكايتنا اليوم على ستوت أم البهوت لي بالذيب تسرح، وتنح الضرسة للكلب وهو ينبح، عورة و تخيط الكتان، وعرجا وتفوت الحيطان، وطرشة تجيب الخبر من كل مكان.
مرة كانت من حانوت لآخر تمشي وتدور حتى لحڨت عند شيخ و قعدت تساوم فيه على الكتان ، سمعت بياع يبرح: "لي يحب قطعة كتان، بلا ما يدفع فيها الأثمان، يجاوبني بفصيح اللسان، على لغز قالوه ناس زمان".
هي عجبها الحال و راحت تجري ليه وقاتلو: سمعني المحاجية نعطيك الحل.
قالها:"حاجتين اثنين صنعهم الانسان يتهزو معاك من مكان لمكان الأنثى فيها الربح والذكر فيه الخسران" . قاتلو الحل هو "الإبرة و المقص " وعطاها قطعة الكتان فرحت بيها ولاحتها فوق كتفها و كملت تمشي حتى لقات ثلاث رجال يدوسو على حمار ( حشاك ).
قالتهم: اعطوهلي نديه أنا.
ضحكوا وقالولها: وتديه بلاش اه ؟ قاتلهم : نعطيكم محاجية إذا حليتوها نروح في حالي وإذا ماعرفتوش ندي حماري.
قالولها: احنا ثاني نعطوك ثلاث محاجيات اذا حليتهم نعطوك لحمار ...
قال الاول: "راسها راس اللفعة وهي ماتلدغ" , قالتلو: هذي ساهلة "الفكرون".
قال الثاني: "حفنة ايباري مهودة من بر السحاري و اللي يمسها يقول اه يا ناري، قالتلو: يجعلك تتوسد عليه وكما قالوا أملس في وجهو واحرش في قفاه وهو "القنفود".
قال الثالث: "راجل ومسترجل ومغطي بورق السفرجل "
قالت: و هادا ساهل وهو "السردوك"
بهتوا فيها وقالولها خلاص اعطيلنا اللغز تاعك
قالتلهم: "عينو خضرة وزرقة ووذنو مورقة ولبستو بارقة , النار ماتحرقوش وكرعيه بالمشية ما يسمعوش ,عندو 16 موس بصح ما يذبحوش"
داو نهارهم في تخمام حتى قربت الحالة على الظلام وقالولها: هنا يڨضى الكلام يا ستوت كلامك كبير، وما لڨينالو تدبير والحمار راه ليك ...
أعطاتلهم الجواب و اللي هو ( ...الحوت...) وركبت على حمارها و راحت لدارها بمغانم نهارها. وحكايتنا قضات وقلوبكم بالعبرة ضوات.
إرسال تعليق