#حكاية_اليوم_الوحش_خطاف_لعرايس_
بسم الله بديت وعلى النبي صليت وبيه كلامي حليت وليكم بهاذي الحكاية جيت. صلو يا جماعة عليه..."صلى الله عليه وسلم"
لكل حكاية معناها حكاوها لجداد يامحلاها جيتكم ليوم نحكيها وفي قلوبكم نخبيها نتفكرو ناس زمان ونقولو كان يامكان..
يحكيو زمان ، في بلاد بعيدة لي يروحلها يشقى ولي ماراحلها يتهنى ، كان عايش فيها وحش يخطف العرايس ، العرس لي يكون يحظر فيه ويتنكر في هيئة انسان عادي وكي يطيح الليل يخطف العروسة ويرفدها بين ساقيه ويطير بيها لبعيد .
وكيما دارو معاه مقدروش يحكموه حتى يأسو منو وتعبو وقررو باه واحد مابقى يتزوج ، وحتى بنات هذيك البلاد ولاو يرفضو الزواج من خوفهم منو .
ولد السلطان كانت عاجباتو بنت عمو وحتى هي كانت تحبو وكي خطبها فرحت ومارفضت .. وكيما دارو معاهم أهلو وأهلها ماقدروش يمنعوهم من الزواج .
مالا خمم الأمير وقرر أنو يتزوج ويدير عرس كبير و يتحدي الوحش خطاف العرايس .
ودارو عرس كبير استدعاو ليه الكبير والصغير ، الغني و الفقير والخيرات من كل خير وحتى الذهب توزع على المعازيم ..
وكيما كان الحال الوحش الشرير متنكر حاضر وسط المدعوين ياكل و يشرب من خيرات عرس الأمير . وكي طاح الليل غدر الجميع ورفد الأميرة بين ساقيه وطار بيها لبعيييد بعيد وخلاهم حايرين مبهوتين.
تقلق ولد السلطان ورفد سيفو الكبير والمال والذهب وأغلى مايملك وركب على حصانو وراح يجري مخلي أمو وراه دمعتها على خدها وهام في بلاد ربي الواسعة بلاد يعمرها وبلاد يخليها حتى وصل لبلاد اسمها بلاد اللبة ، كي شافوه ناسها عرفوه بلي غريب عليهم سقساوه وش تدير هنا ، حكالهم حكايتو مع خطاف العرايس وكيفاه خطفلو مرتو وقالهم بلي خرج وراه باه يرجع عروستو ..
قالولو اذا تدخل للقرية هذي صعيب باه تخرج منها على خاطر باه تخرج لازم تفوت على صخرة هي فالأصل لبّة وكون تقيسها تبلعك ، ونصحوه وقالولو باه تسلك منها على خير لازم كي تقربلها وتشوفك وتعرف بلي راح تبلعك ارضع من صدرها .
وكيما كان الحال راح الأمير لبلاصة الصخرة وكي شافاتو قرب لها بدات تتزعزع حبت تهجم عليه وتبلعو ..
ولكن هو كان أسرع وأخف منها ، رمى روحو عليها ورضع من حليبها .
هدات الصخرة وقاتلو ( ياولد السلطان لوكان مجاش حليبي بين اسنانك تسمع التطقطيق مابين عظامك) .
هيا احكيلي وش جابك عندي .
قالها يا أمي اللّبة أنا لي بيا خطاف العرايس وحكالها حكايتو كاملة معاه.
قاتلو انا نخليك تفوت بصح عندي شرط .
راك كي تخرج من بلادي تدخل على جبل يحرسو غول نحبك تجيبلي من عندو زهرة اسمها زهرة النرجس ..
وخلاتو راح في أمان .
خرج الأمير من هذيك البلاد بسلام وكمل طريقو وكلما يعيا يقعد يرتاح شوي ياكل و يشرب ويزيد يكمل المشي
مشى مشى حتى وصل لجبل خرجلو غول كبير قالو وش تدير هنا في بلادي ؟
قالو انا نحوس على زهرة النرجس لأمي اللّبة ، قالو الغول كي عادت اللّبة هي لي خلاتك تفوت نمدلك الزهرة . وداه و ورالو بلاصتها .
دا الأمير الزهرة ، وقبل مايخرج قالو الغول احكيلي حكايتك ، وحكالو الأمير حكايتو مع خطاف العرايس .
قالو الغول مالا كي تخرج من عندي راك تدخل لبلاد الحجر . هذيك هي بلاد خطاف العرايس جميع من يدخل لها ينفخ عليه الوحش يرجعو حجر . والوحيد لي قعد عايش فيها هو الراعي خلاه باه يرعالو الغنم .
دخل الأمير لبلاد الحجر ولقى الراعي لي حكالو عليه الغول ، الأمير يقرب وهذاك الراعي يشاورلو من بعيد ويقولو روح ،
الأمير يزيد يقرب والراعي يزيد يشاورلو ويقولو روح وارجع منين جيت ..
راح الراعي يجري عند الأمير وقالو وش تدير هنا ؟؟ شوف هاذو الحجر كامل كانو رجال كيما انت نفخ عليهم الوحش رجعهم حجر كيما راك تشوف فيهم ، روح قبل ما يشوفك ويرجعك حجرة كيما هوما .
قالو الأمير انا جيت نحوس على عروستي لي خطفهالي الوحش وحالف ميات يمين مانولي غير وهي معايا..
وكيما دار معاه الراعي باه يخرج ويرجع منين جا مقدرش يقنعو .
مالا عرض عليه الأمير وقالو وش رايك نمدلك المال لي عندي كامل والذهب ونزيدلك الحصان ونتبادلو بالحوايج ، أنا نولي راعي عند الوحش ونحوس وين مخبي لعرايس ندي الأميرة ونحررهم وانت تدي حريتك وتولي غني وتعيش حياتك .
خمم هذاك الراعي بينو بين روحو وقال وش خير لي أنا من حياة الهم لي عايشها حياتي كامل وانا مربوط عند الوحش وعايش وسط الغنم وحتى في كرشي مانيش شبعان ناكل غير من الليل لليل كي نرجع الغنم ..
عجباتو الفكرة وقال للأمير بلي موافق ولكن عندو شرط .
قالو راهي كاينة كلمة سر بيني و بين الوحش واحد مايعرفها من غيري انا واياه لازم نحفظهالك باه كي يسقسيك تعرف تجاوب .
قالو الراعي هاك هاذي العصى مع المغرب اضرب بيها البحر يتشق وتبان فيه طريق . خلي الغنم و الحيوانات كااامل يفوتو اصبر عليهم و وسع بالك حتى يفوتو ويرجع البحر كيما كان . يجي عندك الوحش يقولك وين كنت ؟قولو كنت في ڨابس
يقولك كاش حشيش ؟ قولو الأخضر واليابس
يقولك جاك الذيب ؟ قولو تعرفو يغيب؟
يقولك علاه معيطتليش ؟ قولو صوتي ماشي بوق
يقولك علاه مشاورتليش ؟ قولو جناحي ماشي علام .
يحط يدو على راسك و يقولك فوت فوت اني غير نلعب عليك . قولو حتى أنا نلعب عليك .
ومبعد يرفدك على جناحو ويديك لوين عايش هو والنساء لي خاطفهم تلقى كوخ صغير هذاك الكوخ هو لي نعيش فيه أنا ونرقد فيه ، تجي عندك وحدة من النساء لي خاطفهم تغسلك رجليك وتجيبلك العشاء.
حفظ الأمير الكلام لي قالهولو الراعي مليح وتبادلو الحوايج ومدلو الذهب وكل ما يملك . وحكم غير زهرة النرجس لي وعد بيها اللّبة .
وهذاك الراعي دا كل واش مدلو الأمير وهرب فوق الحصان .
الأمير قعد يستنى حتى غرب المغرب ضرب البحر بالعصى لي مدهالو الراعي . تشق البحر وفاتت الحيوانات كامل زاد ضرب البحر ورجع كيما كان.
جا عندو الوحش قالو وين كنت ؟ قالو الأمير كنت في ڨابس
قالو كاش حشيش ؟ قالو الاخضر واليابس
قالو جاك الذيب ؟ قالو تعرفو يغيب ؟
قالو علاه معيطتليش ؟ قالو صوتي ماشي بوق
قالو علاه مشاورتليش ؟ قالو جناحي ماشي علام .
جا الوحش وقرب للأمير وحط يدو على راسو كيما قالو الراعي وقالو فوت فوت نلعب عليك. قالو الأمير حتى أنا نلعب عليك .
رفدو فوق جناحو وداه لوين عايش هو والعرايس لي خاطفهم وراح . والأمير راح للكوخ لي قالو عليه الراعي .
هو دخل للكوخ وهي دخلت عليه بنت عمو بالماء سخون . هي هبطت راسها باه تغسلو رجلو وهو حكمها من يدها كي شافت فيه عرفاتو بلي ولد عمها ناضت تبكي وتقولو ياولد عمي وش تدير هنا كون يفيق بيك ليوم يقتلك ويقتلني.
قالها متخافيش أنا من الدقيقة لي خطفك فيها الوحش وطار بيك خرجت وراك و حلفت باليمين وعزمت مانولي غير بيك .
بعدما سكتت الأميرة وهدات قالها احكيلي وش صاير هنا قوليلي وش يديرلكم وكيفاه يعاملكم ؟
قاتلو ملي يدخل وهو يضرب فيا على خاطر يقولي قولي روحي مع روحك وانا منحبش نقول .
قالها ساهل .. الليلة كي يجي يضربك قوليلو انا تعبت قولي وين جات روحك ونقولك روحي مع روحك .
سمعت الأميرة كلام ولد عمها وراحت .. وكي جا عندها الوحش قالها قولي روحي مع روحك. قاتلو قولي وين جات هاذي روحك .
جبدلها عصى قالها العصى هاذي نضرب بيها البحر يتشق وتبان في وسطو طريق في وسط هاذيك الطريق كاين بير قاعدة فوق منو حمامة . هذيك الحمامة هي روحي أنا .
سمع الأمير كلام الوحش من ورى الباب استناه حتى رقد وراح رفد هذيك العصى وراح يجري للبحر ضربو تشق مشى فيه حتى لقى البير في وسطو ولقى هذيك الحمامة حكمها ولوالها رقبتها كي ماتت الحمامة عيط الوحش عيطة ناضو النساء كل يجريو لقاوه ميت في بلاصتو
رجع الأمير وفوت الأميرة مع هذوك النساء كامل من البحر ورجع من طريقو شكر الغول وراح .
وزاد فات على بلاد اللّبة مدلها زهرة النرجس كي شمتها تفك سحرها ومبقاتش صخرة ورجعت لبّة كيما كانت .
ورجع لبلادو وكل امراة راحت لأهلها وعاود الأمير دار عرس كبير والمرة هذي الفرحة ثلاثة فرحات
فرحة رجوع لعرايس لأهاليهم
وفرحة رجوع الأمير
وفرحة أهل البلاد بموت الوحش الشرير...
وطاحو تفاحتين وحدة ليا ووحدة للسامعين
إرسال تعليق